បេសកកម្មរបស់យើង៖ បេសកកម្មរបស់មូលនិធិហាប់ស្វែល គឺដើម្បីផ្តល់ភាពអង់អាចដល់នារីជា​អ្នក​ដឹក​នាំ​​ជំនាន់ថ្មី នៅ កម្ពុជា និងនៅក្នុងប្រទេសកំពុងអភិវឌ្ឃន៍។ យើងជឿជាក់ថា ស្ត្រីដែលទទួលបានការអប់រំ និងមានសមត្ថភាពជា​អ្នកដឹក​នាំ​ បង្កើតបានជាកម្លាំងខ្លាំងបំផុតដើម្បីនាំមកនូវការផ្លាស់ប្តូរជាវិជ្ជមាននៅក្នុង​ប្រទេសកំពុងអភិវឌ្ឍន៍។ ការអប់រំ​ និង ភាព ជាអ្នកដឹកនាំដែលមានចក្ខុវិស័យខ្ពស់ គឺមានក្តីសង្ឃឹមដ៏ល្អ​បំផុត​សម្រាប់ថ្ងៃអនាគត។ ជាអកុសល ស្ត្រីនៅក្នុងប្រទេស កម្ពុជា រងនូវគុណវិបត្តិមួយ បើធៀបទៅនឹងបុរស ដោយសារតែសាកលវិទ្យាល័យ មិនបាន​ផ្តល់​នូវលំនៅដ្ឋានសម្រាប់ និស្សិតស្នាក់នៅ។ កង្វះលំនៅ​ដ្ឋាន​នេះ  មិនមែនជាបញ្ហាធ្ងន់ធ្ងរ​សម្រាប់​​និស្សិត​ប្រុស ដែលអាចរស់នៅក្នុងវត្តព្រះពុទ្ធ​សាសនា ​ដោយពុំបាច់បង់ប្រាក់ ឬ អាចជួលផ្ទះ​នៅ​ដោយ​សុវត្ថិភាពនោះទេ។ ផ្ទុយទៅវិញ និស្សិតស្រីមិន​អាចរកកន្លែង ស្នាក់នៅ ដោយងាយស្រួលឡើយ។ ដូច្នេះ ដោយសារកង្វះកន្លែងរស់នៅប្រកបដោយសុវត្ថិភាព ខណៈ​ដែលពួកគេ ​កំពុង​សិក្សានៅសាកល​វិទ្យាល័​យ ស្ត្រីវ័យក្មេងភាគច្រើននៅក្នុង​ប្រទេស​កម្ពុជា​ ត្រូវ​​បានរារាំងពីការទទួលបាន​ការអប់រំ កម្រិត​ឧត្តមសិក្សា។

អ្វីដែលយើងធ្វើ៖ មូលនិធិហាប់ស្វែល ជ្រើសរើសសិស្សវិទ្យាល័យជាស្ត្រី រៀនពូកែ និងជោគជ័យ​ ​ដែលបានបង្ហាញ ភាពជាអ្នកដឹកនាំ ព្រមទាំងទស្សនៈវិស័យសម្រាប់អនាគតរបស់ពួកគេ។ មូលនិធិ​ហាប់ស្វែល ផ្ដល់កន្លែងស្នាក់នៅ បន្ទប់គេង និង ការអប់រំបន្ថែមដល់សិស្សទាំងនេះនៅក្នុង​អន្តេវាសិកដ្ឋាន​ទំនើប​ទាំងពីររបស់ខ្លួនក្នុងរាជធានីភ្នំពេញ។ ពួកគេអាចចូលរៀនក្នុងសាកល​វិទ្យាល័យ​ណា​​​មួយ នៅរាជ​ធានី​ភ្នំពេញ និងស្នាក់នៅដោយសុវត្ថិភាព​ក្នុង​អន្តេវាសិក ដ្ឋានរបស់យើង​សម្រាប់រយៈ​ពេលបួនឆ្នាំ ហើយទទួល​បាន​ដោយ​ឥតគិតថ្លៃនូវម្ហូបអាហារ ប្រាក់​ឧបត្ថម្ភ អ៊ិនធឺណិត មធ្យោបាយ​ធ្វើដំណើរ និងឱកាសដើម្បីជួប​ភ្ញៀវ​កិត្តិយស និងវាគ្មិនជាតិ និងអន្តរជាតិជាច្រើន។ មូលនិធិហាប់ស្វែល ផ្តល់នូវការអប់រំសំខាន់​ៗ​បន្ថែម​ទៀតដូចជា​ ភាសាអង់គ្លេស កុំព្យូទ័រ ជំនាញការត្រិះរិះពិចារណា​ និងការបណ្តុះបណ្តាល ភាព​ជាអ្នកដឹកនាំ សម្រាប់​ស្ត្រីវ័យក្មេង​ដែល​ត្រូវ​បាន​ជ្រើសរើសសម្រាប់កម្មវិធីរបស់យើង។ សិស្សដែលជ្រើស​រើស​ដោយ មូលនិធិ​ហាប់ស្វែល ត្រូវសិក្សា​ក្នុង​សាកលវិទ្យាល័យណាមួយតែមួយគត់ និង​​ត្រូវ​ធ្វើកា​រ​ប្តេជ្ញា​ជាលាយ លក្សណ៍អក្សរ ថាខ្លួននឹងរស់នៅក្នុង​អន្តេវាសិកដ្ឋាន​សម្រាប់រយៈ​ពេល​បួន ឬប្រាំ​ឆ្នាំពេញ​លេញ រហូតដល់ ពេលពួកគេបាន​ទទួល សញ្ញាប័ត្រ។

អន្តេវាសិកដ្ឋាន៖ អន្តេវាសិកដ្ឋានទំនើបទាំងពីររបស់យើង មានទីតាំងក្បែរសាកលវិទ្យាល័យធំៗ​មួយ​ចំនួន​ ក្នុ​ង​រាជធានី​ភ្នំពេញ។ និស្សិតរស់នៅក្នុងបន្ទប់ មានផាសុខភាព​ ដែលមានគ្រែ តុរៀន និង ទូខោអាវ។ ​​​​​​​ ក្នុង​អន្តេវាសិកដ្ឋាន មាន​បន្ទប់ កុំព្យូទ័រ និងបណ្ណាល័យមួយ។ ចុងភៅរបស់មូលនិធិហាប់ស្វែល ចម្អិនអាហារ​ថ្ងៃត្រង់សម្រាប់និស្សិត រីឯអាហារពេល ព្រឹក និងពេលល្ងាច និស្សិតត្រូវចម្អិនរួមគ្នា។ និស្សិតត្រូវធ្វើការរួមគ្នា​ ក្នុងការរៀបចំកន្លែងស្នាក់នៅ រួមមានការលាង សំអាត និងសកម្មភាពផ្សេងៗ។ មូលនិធិហាប់ស្វែល មានសន្តិសុខធ្វើការពេញម៉ោងដើម្បីយាមកាម និងរក្សាសុវត្ថិ​ភាព។ បុគ្គលិកជាស្ត្រីទាំងអស់ រួមទាំងអ្នកតំណាង​ភាពជាអ្នកដឹកនាំជាស្ត្រីបរទេសវ័យក្មេង ដែលមកស្នាក់នៅក្នុង អន្តេវាសិកដ្ឋាន និង ជួយបង្រៀន​និស្សិតរបស់យើង។

កម្មវិធីសិក្សាក្នុងអន្តេវាសិកដ្ឋាន៖ យើងផ្តល់កម្មវិធីសិក្សាក្នុងអន្តេវាសិកដ្ឋានរួមមាន ថា្នក់ភាសាអង់គ្លេស ភាសាបារាំង​ កុំព្យូទ័រ ការពិភាក្សាឬជជែកដេញដោល ជំនាញការងារ ការត្រិះរិះពិចារណា ព្រមទាំងការ សរសេរវិភាគ។ និស្សិត ទទួលបាន​ព័ត៌មានយ៉ាង​ច្បាស់​អំពីព្រឹត្តិការណ៍បច្ចុប្បន្ន និងចូលរួមក្នុងសកម្មភាព វប្បធម៍ជាច្រើន។​ មូលនិធិហាប់ ស្វែលផ្តល់ជូនដល់និស្សិតនូវថ្នាក់រៀនតន្រ្តី​ដូចជា ព្យាណូ ហ្គីតា និង​​វិយូឡុង ហើយនិស្សិតក៏បានរួមគ្នាបង្កើតជាក្លឹប តន្រ្តី ក្លឹបរៀនភាសាអង់គ្លេស​ ក្លឹបអានសៀវភៅ​និង​ក្លឹបកីឡា។

ការបន្តការសិក្សានៅសហរដ្ឋអាមេរិករបស់និស្សិតហាប់ស្វែល៖ និស្សិតពូកែបំផុត​របស់​យើងដែលចេះ ភាសាអង់គ្លេស ជ្រៅជ្រះ និង​មានប្រវតិ្តជាអ្នកដឹកនាំល្អ នៅក្នុងអន្តេវាសិកដ្ខាន មានឱកាសបន្តការសិក្សា នៅសហរដ្ឋ​អាមេរិក រយៈ ពេល​មួយឆ្នាំ​ បន្ទាប់​ពីបានបញ្ចប់​ការ​សិក្សានៅកម្ពុជា។

អតីតនិស្សិត៖ និស្សិតរបស់យើងទទួលបានការគាំទ្រ ​ដោយពួកគេទទួលបានការណែនាំ និងជំនួយជាទៀង​ទាត់ពី​អតីតនិស្សិតមូលនិធិហាប់ស្វែល។ និស្សិតបញ្ចប់ការសិក្សានៅតែមានទំនាក់ទំនងគ្នា​ តាមរយៈ​សមាគមអតីតនិស្សិត មូលនិធិហាប់ស្វែល។ សូមចូលទស្សនាទំព័រហ្វេសប៊ុកអតីតនិស្សិតរបស់យើង៖     https://www.facebook.com/Harpswell-Alumnae-Association-277533419035285/?fref=ts​មូលនិធិហាប់ស្វែល បន្តគាំទ្រដល់និស្សិតបញ្ចប់ការសិក្សាតាមរយៈការបង្កើតកម្មវិធី និងឱកាសបណ្តាញ​ទំនាក់ទំនង សង្គម​បន្ទាប់ពីពួកគេបញ្ចប់ការសិក្សា។​​​  យើងក៏បន្តផ្តល់កន្លែងស្នាក់នៅសម្រាប់និស្សិត រយៈពេលមួយឆ្នាំ ក្រោយពីពួក គេបានបញ្ចប់ការសិក្សា។

សមិទ្ធិផលរបស់យើង៖ គិតត្រឹមខែកក្កដាឆ្នាំ ២០១៨ យើងមាននិស្សិតបញ្ចប់ការសិក្សា ចំនួន ១៥៧នាក់ ចាប់ផ្តើម ជាមួយថ្នាក់នៃឆ្នាំ ២០១០។ ​និស្សិតបញ្ចប់ការសិក្សារបស់យើង បានធ្វើការ​ជាមេធាវី នៅក្នុង​ក្រុមហ៊ុន​​ច្បាប់ អ្នកគ្រប់ គ្រងគម្រោងនៅក្នុងអង្គការមិនមែនរដ្ឋាភិបាល អ្នកកាសែត អ្នកគ្រប់គ្រងហិរញ្ញវត្ថុ បុគ្គលិកនៅក្នុងក្រសួងរដ្ឋាភិបាល គ្រូបង្រៀន និងជាសហគ្រិន។ ​និស្សិតបញ្ចប់ការសិក្សាចំនួន ៣០​នាក់ របស់យើង បានទទួលអាហារូបករណ៍​សម្រាប់ ការសិក្សាថ្នាក់អនុបណ្ឌិតនៅក្រៅប្រទេស ​រួមមានមហាវិទ្យាល័យនៅសហរដ្ឋអាមេរិក និងសាកល​វិទ្យាល័យ​ជា​ច្រើន ទៀត។ បច្ចុប្បន្ននេះ យើងមាននិស្សិត​នារីឆ្នើមចំនួន ៧៥នាក់ ដែលមកពីបណ្តា​ខេត្តនានា ហើយកំពុងសិក្សាក្នុង សាកលវិទ្យាល័យ​មួយ​ចំនួនក្នុង រាជធានីភ្នំពេញ។